افغانستانېنگ حأضرکی حکومتینینگ گؤزه‌گچیلیگیندأکی دمیر یوْل اداره‌سېنېنگ خبر بریشینه گؤرأ، ادارانېنگ باشلېغې بخت‌الرحمن شرافت بیلن بیر توْپار هیأت؛ تۆرکمنیستانېنگ رسمی چاقېلېغې بیلن شۉ گۆن (چهارشنبه 29 نومبر) تۆرکمنیستانا گیتدی.
بۉ هیأتینگ رسمی ایش سفریندا، تۆرکمنیستانېنگ دمیریوْل جوْغاپکأرلری بیلن اوْتلې غاتناوېنېنگ اۆستۆنده ایکی طرفېنگ ایشدشلیگی، غاتناو و اکسپوْرتېنگ کؤپلدیلمه‌گی و شۉنگا منگزش موضوع‌لارېنگ حقېندا گپله‌شیلجکدیگی گؤز اؤنگۆنده تۉتۉلان دییپ، دمیریوْل اداره‌سی خبر بردی.
مۉندان ایکی گۆن اؤنگ، افغانستانېنگ حأضرکی حکومتینینگ داشارې ایشلر وزیری امیرخان متقی، تۆرکمنیستانېنگ افغانستانداقې ایلچیسی خواجه عوضوف بیلن کابل‌ده دۉشۉشېپ‌تې.
اوْلار، بۉ دۉشۉشېقدا ایکی یۉردۉنگ آرا غاتناشېغې، اقتصادی مسئله‌لر و اوْرتاق اۉلې تاسلامالار حقېندا گۆررۆنگ ادیپ‌تیلر.
تۆرکمنیستان حکومتی، افغانستاندا طالبان حأکمیتی اله آلندن سوْنگ، آرا غاتناشېغې ساقلادې و خاص هم جبیسلشدیردی.
طالبانـ‌ېنگ تۆرکمنیستانداقې ایلچیسی‌نی قبول اتدی و افغانستانېنگ اوْبا خوْجالېق ایشلرینده، اقصادی مسئله‌لرینده و باشغا-دا شۉلار یالې… اوْرتاق موضوع‌لاردا همکأرلیک اتدی.
اؤنگ تۆرکمنیستانېنگ طالبان بیلن اساسې مقصدې، «تاپی» تاسلاماسېنې عمله آشېرماق‌تې یؤنه سوْنگقې دؤورلر، افغانستانېنگ اۆستی بیلن دینگه پأکیستانا گاز گچیریش تاسلاماسېنې اوْرتا غوْیدې. تیزلیکده بۉ تاسلامانېنگ ایشه باشلاماسېنا غاراشېلیوْر.